Shkon në 78 numri i të vdekurve nga vërshimet në Teksas, dhjetëra të zhdukur
Të paktën 78 njerëz janë konfirmuar të vdekur në pjesën qendrore të Teksasit dhe 41 të tjerë janë të zhdukur pas vërshimeve të shpejta të së premtes.
Gjashtëdhjetë e tetë raste fatale, përfshirë 28 fëmjë, u shënuan në distriktin Kerr, ndërsa dhjetë vajza dhe një këshillues nga Kampi Mistik janë ende të zhdukur, raporton televizioni BBC.
Zyrtarët thonë se numri i përgjithshëm i viktimave me siguri se do të rritet. Më shumë stuhi priten në 24 deri 48 orët e ardhshme në rajon dhe ato mund t’i pengojnë ekipet e shpëtimit, të cilat tashmë po ballafaqohen me gjarpërinj helmues, baltë e mbetje të tjera.
Guvernator i Teksasit, Greg Abbott, tha të dielën se autoritetet “nuk do të ndalen në asgjë” për t’u siguruar që secili person i zhdukur të gjendet.
“Nuk ishte asgjë më pak se e tmerrshme që të shihje se nëpër çfarë kishin kaluar ata fëmijë të vegjël” – tha ai, një ditë pasi e vizitoi zonën e prekur nga vërshimet.
Presidenti amerikan, Donald Trump, të dielën e nënshkroi shpalljen e fatkeqësisë për distriktin Kerr, duke e aktivizuar Agjencinë Federale të Menaxhimit të Emergjencave në Teksas. Ai tha se ndoshta do ta vizitojë shtetin jugor amerikan të premten.
