SBAShK inicion nismë për mbledhjen e nënshkrimeve, kërkohen ndryshime të skemës pensionale

Kryetari i Sindikatës së Bashkuar të Arsimit, Shkencës dhe Kulturës, Rrahman Jasharaj ka thënë se është iniciuar një nismë për mbledhjen e nënshkrimeve rreth ndryshimit të skemës pensionale.

Sipas “EO”, ai është shprehur i bindur në mbledhjen e mbi 10 mijë nënshkrimeve, për nismën që synon që punëtorëve të arsimit të viteve të 90-ta t’iu llogariten si vite kontributdhënëse.

“Duke respektuar qëndrimet e përfaqësueseve të SBAShK-ut që nga çerdhet e deri në universitet, kemi ardhur me një përfundim të fillojmë me një nismë me mbledhjen e nënshkrimeve nga anëtarësia jonë por edhe nga qytetarët që t’i drejtohemi Kuvendit të Kosovës që të ndërrojnë pjesën e ligjit për skemën pensionale. Kohëve të fundit me ndryshimin e bërë janë mohuar te drejtat e punëtorëve të arsimit”, ka thënë Jasharaj, teksa shpreh bindjen se ligjvënësve do t’u dërgohen më shumë se 10 mijë nënshkrime.

“Kjo nismë ka për qëllim që t’i kthehet e drejta që e ka bërë vet parlamenti punëtorëve të arsimit viteve te 90-ta që këto vite te jenë vite kontributdhënëse që të marrin pensionin e plotë që do të ndihmonte jo vetëm punëtorëve të arsimit po të gjithë sektorët publike, që të arrijnë kriterin për 15 vite. Jam i sigurt se jo vetëm 10 mijë po shumë më shume nënshkrime do të mblidhen për nja afat shumë të shkurtër dhe do t’ia dërgojmë organeve përgjegjëse.” – citohet se ka thënë ai.