RTK në krizë: Pa drejtor të përgjithshëm dhe me bord pa kuorum
Radio Televizioni i Kosovës nga data 1 maj, ka mbetur pa ushtrues detyre të drejtorit të përgjithshëm, pasi mandati i Hysen Hundozit ka skaduar, ndërsa nuk është emëruar një pasues.
Hundozi ishte caktuar si ushtrues detyre më 31 tetor 2024 dhe mandati i tij 6-mujor ka përfunduar sipas afatit ligjor. Statuti i RTK-së nuk lejon zgjatjen e mëtejshme të këtij roli pa procedura të reja për emërim.
Neni 16 pika 4 e Rregullores për Rregullimin e Procedurave të Konkursit në RTK thotë:
“Caktimi i Ushtruesit të Detyrës së Drejtorit të Përgjithshëm bëhet në kohëzgjatje jo më shumë se 6 muaj”.
Ndërsa pika 5 e po të njëjtit nen thotë:
“Në rast se edhe pas periudhës prej 6 muajve nuk emërohet Drejtori i Përgjithshëm në bazë të konkursit publik, ushtrues detyre do të emërohet një i punësuar tjetër i RTK-së”.
Kjo rregullore ia pamundëson z.Hundozi që ta ushtrojë detyrën e Drejtorit të Përgjithshëm pasi që e ka konsumuar afatin prej 6 muajve sa ishte në këtë detyrë.
Mirëpo kjo nuk është e gjitha pasi që Bordi i RTK-së aktualisht ka vetëm katër anëtarë aktivë prej 11 sa duhet t’i kishte, e kjo e përkeqëson situatën edhe më shumë.
Ndërsa kuorumi për vendimmarrje sipas ligjit të RTK-së neni 30 pika 4 duhet të jetë së paku 6 anëtarë prezentë. Pra asnjë vendim nuk mund të merret në Bord nëse prezentë nuk janë së paku 6 anëtarë të kësaj trupe, shkruan Demokracia.
