Rrëfimi prekës i Vasfije Krasniqit: U ktheva në vendin ku jeta ime ndryshoi përgjithmonë
Vasfije Krasniqi ka ndarë një rrëfim prekës në rrjetet sociale, duke treguar se pas shumë vitesh është rikthyer në një nga vendet ku kishte përjetuar dhunën që i ndryshoi jetën përgjithmonë.
Në postimin e saj, ajo shkruan se kishte vendosur të vizitonte shtëpinë ku, si 16-vjeçare, kishte përjetuar tmerrin e luftës. Sipas saj, shtëpia e parë ku kishte ndodhur dhuna nuk ekziston më, ndërsa objekti i dytë ende qëndron.
“Doja të hyja në dhomën ku ndodhi krimi, në dhomën ku mbetën të varrosura britmat, frika dhe pafuqia e një vajze të re. Nuk munda”, shkroi ajo.
Ajo shtoi se për të, ajo shtëpi nuk është thjesht një vend, por një pjesë e errët e historisë së saj personale, vendi ku, sipas fjalëve të saj, iu mor pafajësia, siguria dhe një pjesë e shpirtit.
Në rrëfimin e saj, Krasniqi theksoi se nuk ishte kthyer për të kërkuar mëshirë, por për t’u përballur me kujtimet dhe për të parë se vendi ende ekziston, ndërsa ajo vazhdon të jetojë me pasojat e asaj që kishte ndodhur aty.
“Dhe sot, më shumë se kurrë, zemra ime ndihet e thyer”, përfundoi ajo në postimin e saj.
