Qalaj: S’ka pasur negocim midis KFOR-it dhe grupit terrorist në Banjskë
Deputeti nga radhët e Partisë Demokratike të Kosovës, Rashit Qalaj, beson se nuk ka pasur kurrfarë negocimi midis zyrtarëve të KFOR-it dhe grupit terrorist serb në Banjskë.
Në një prononcim për Radio Dukagjinin, Rashit Qalaj, ish-drejtor i Policisë së Kosovës, deklaratën e Grupit Ndërkombëtar të Krizave e ka quajtur joserioze.
Deklaratën e tij, Qalaj thotë se e bazon në bisedat individuale që ka pasur me pjesëtarë të Njësive Speciale të Kosovës.
“Unë kam qenë i befasuar nga ajo pjesë e raportit nga Grupi Ndërkombëtar i Krizave, i cili thoshte se në Banjskë ka pasur negociata në mes të ushtarëve të KFOR-it dhe grupit terrorist i udhëhequr nga Millan Radojqiqi dhe unë që nga fillimi mendoj që nuk ka pasur negociata, unë e kam mbajtur gjithmonë këtë qëndrim duke e njohur si reagon dhe si vepron Policia e Kosovës e posaçërisht reagimin e njësive speciale, dhe jam shumë i sigurt në atë që po e them dhe po ashtu deklaratën time e bazoj edhe në bisedat individuale që kam pasur me pjesëtarë individualë të njësive speciale që ka qenë pjesë e këtij operacioni që nuk ka pasur kurrfarë negocimi në mes të KFOR-it dhe grupit terrorist. Ndërsa sa i përket raportit të Grupit Ndërkombëtar të Krizave dhe demantimet që i bëri KFOR-i, mendoj që më së shumti ka dëmtuar vetë ata që e kanë lëshuar këtë raport. Nuk ka qenë një deklaratë serioze dhe mendoj që nuk do të merret parasysh”, tha ai, përcjell portali Dukagjini.
