Plagoset me thikë kryetari i Divjakës, Fredi Kokoneshi
Kryetari i Bashkisë së Divjakës, Fredi Kokoneshi është plagosur me thikë këtë të enjte bashkë me shoferin e tij, pas një konflikti me një ish punonjës të bashkisë.
Sipas informacioneve, ai kishte dalë për inspektim në një nga banesat pranë bashkisë së Divjakëd dhe në atë moment ka pasur një konflikt me autorin Orges Xhelili.
Kryebashkiaku ndodhet në spitalin e Lushnjës, jashtë rrezikut për jetën, ndërsa i është nënshtruar një ndërhyrjeje kirurgjikale.
Edhe shoferi i tij Gazmend Bullari ndodhet gjithashtu jashtë rrezikut për jetën në spitalin e Lushnjës.
Mësohet se Orges Xhelili, i cili dyshohet se i plagosi me thikë, kryetarin e shoferin e tij, më herët ka punuar si punonjës, konkretisht IT pranë bashkisë së Divjakës për një periudhë të shkurtër.
Ende nuk janë bërë të qarta plotësisht arsyet e konfliktit mes tyre, ndërsa grupi hetimor pritet të zbardhë rrethanat e kësaj ngjarje.
Autori është kapur dhe shoqëruar në komisariat, ndërsa forca të shumta policie janë në spital, ku ndodhen dy të plagosurit.
“Rreth orës 09:30, në afërsi të bashkisë Divjakë, shtetasi O. Xh., 46 vjeç, dyshohet ka goditur me mjet prerës, shtetasin F. K., me detyrë Kryetar i bashkisë Divjakë dhe shoferin e tij, shtetasin G. B., 45 vjeç. Të dëmtuarit janë transportuar menjëherë dhe po marrin ndihmë mjekësore, në Spitalin Rajonal Lushnjë. Falë veprimeve të shpejta operacionale të shërbimeve të Policisë, është kapur dhe shoqëruar në Komisariat, për veprime të mëtejshme procedurale, shtetasi O. Xh., si autor i dyshuar i plagosjes. Në vendngjarje ndodhen drejtuesit më të lartë të DVP Fier. Grupi hetimor, nën drejtimin e Prokurorisë, po punon për sqarimin e plotë të rrethanave të ngjarjes“, thuhet në njoftimin e policisë.
