Përmbytjet nga shiu: Haradinaj kërkon që institucionet qendrore t’i dalin në ndihmë Gjakovës e Rahovecit
Kryetari i Aleancës për Ardhmërinë e Kosovës, Ramush Haradinaj, ka reaguar pas situatës emergjente në komunat, Gjakovë dhe Rahovec.
Pas dëmevë që shkaktoi e po shkakton shiu atje, Haradinaj ka kërkuar që institucionet qendërore në Prishtinë, të u dalin në ndihmë atyre lokale, në Gjakovë e Rahovec, në mënyrë që të kapërcehet kjo situatë.
“I shqetësuar nga gjendja e krijuar në Gjakovë dhe Rahovec pas dëmeve të shkaktuara nga vërshimet dhe përmbytjet. Dëmet kanë përfshirë shtëpi banimi, ekonomi familjare, biznese, hapësira e objekte publike dhe toka bujqësore.
Jemi në përkrahje të kryetarëve të komunave Ardian Gjini dhe Smajl Latifi si dhe shtabeve emergjente të komunave Gjakovë e Rahovec, në përpjekjet e tyre që të jenë pranë qytetarëve të prekur nga kjo fatkeqësi natyrore.
Njëkohësisht, kërkojmë intervenim emergjent nga institucionet qendrore në Prishtinë dhe përkrahje direkte për mbulimin e dëmeve të shkaktuara.” Ka shkruar Haradinaj.