Pas rënies së çatisë së objektit të komunës, Rama: Të hetohet rasti

Kryetari i Komunës së Prishtinës, Përparim Rama ka reaguar pasiqë si pasojë e rënies së kulmit të objektit të Komunës së Prishtinës, mbeti e lënduar një grua, e cila po trajtohet në QKUK.

Rama përmes një postimi në Facebook, ka kërkuar nga organet kompetente që ta hetojnë këtë rast.

”Sot, në objektin e Kryeqytetit në lagjen “Arbëria” për shkak të erërave të forta ka kolapsuar një pjesë e kulmit, ku për pasojë një person është lënduar dhe tani është nën kujdes mjekësor”.

“Menjëherë kam kontaktuar me familjarët e të lënduarës për t’iu qëndruar pranë në këto momente. Lutemi për shërimin e saj të shpejtë dhe të plotë. Si Kryetar i Kryeqytetit kërkoj nga organet kompetente që të hetojnë rastin në tërësi dhe të marrin të gjitha masat dhe veprimet në pajtim me legjislacionin në fuqi”, ka shkruar Rama.