Nagavci: Me pikëllim të thellë morëm lajmin se ka ndërruar jetë Dr. Belul Beqaj
Ministrja e Arsimit, Shkencës, Teknologjisë dhe Inovacionit, Arbërie Nagavci ka thënë se me pikëllim të thellë e kanë marrë lajmin për vdekjen e politologut dhe ish-kryetarit të Federatës së Basketbollit, Belul Beqajt.
“Me pikëllim të thellë e morëm lajmin se ka ndërruar jetë profesori universitar, Dr. Behlul Beqaj”, ka shkruar Nagavci në profilin e saj në Facebook.
Nagavci theksoi se Beqaj kishte dhënë kontribut të madh në arsimimin e gjeneratave të reja.
“Profesori Beqaj dha kontribut të madh në arsimimin e gjeneratave të reja, duke u bërë një nga figurat e rëndësishme të arsimit universitar që me përkushtim e kreu këtë mision fisnik dhe mbeti në kujtesën tonë përgjithmonë. Vepra e profesorit Beqaj edhe në publicistikë, hulumtime shkencore dhe analiza politike, do t’iu mbetet gjeneratave si një nga resurset e vlefshme, ashtu sikur edhe kontributi në fushën e artit dhe sportit”, shkroi ministrja e Arsimit.
Behlul Beqaj vdiq sot në mëngjes në moshën 65 vjeçare.
Beqaj ishte autor i dhjetëra punimeve publicistike-shkencore dhe pjesëmarrës në konferenca të shumta brenda dhe jashtë Kosovës.
Ai ishte kryetar i Federatës së Basketbollit të Kosovës nga pas lufta e deri në vitin 2006.
