Mali i Zi vetëm me 564 mijë banorë, dalin rezultatet preliminare të regjistrimit të popullsisë

Rezultatet deri më tash të regjistrimit të popullsisë në Mal të Zi tregojnë për 564 mijë banorë që shënon një rënie krahasuar me censusin e para 12 viteve, kur ishin të regjistruar 620 mijë banorë, sipas të dhënëave në censusin rezultati final i të cilës është shtyrë deri më 28 dhjetor.

Ndihmësdrejtoresha e Drejtorisë së Statistikave-Monstat, Snezhana Remikoviq, ka njoftuar mëngjesin e sotëm se deri më 17 dhjetor janë numëruar 564.000 banorë, 308.000 banesa në 181.000 amvisëri, siç e citoi “Danas”..

Ajo nuk ka komentuar rezultatet e deritanishme të regjistrimit të popullsisë, të cilat tregojnë rënie të popullsisë, por për Televizionin Vijesti tha se “rënia është e dukshme”.

Qeveria e Malit të Zi në fund të javës së kaluar e ka zgjatur regjistrimin edhe për dhjetë ditë, deri më 28 dhjetor.