Lansohet forma e aplikimit për subvencionim të energjisë elektrike për familjet e cenueshme
Ministri i Financave, Hekuran Murati ka njoftuar se është lansuar forma e aplikimit për subvencionim të energjisë elektrike për familjet e cenueshme.
Në profilin e tij në “Facebook”, Murati ka publikuar linkun ku mund të aplikohet për këtë subvencionim.
Ai ka treguar kushtet të cilat duhet të plotësohen nga familjet për të qenë përfitues.
“Kush mund të përfitojë? Të gjitha familjet me të ardhura mesatare mujore më pak se 150 euro/muaj/anëtar, kualifikohen për të aplikuar për subvencionim. Pra nëse një familje ka 4 anëtarë dhe ka të ardhurat mujore më pak se 600 euro/muaj, mund të aplikojë për subvencion. Nëse familja ka 5 anëtarë duhet të ketë të ardhura më pak se 750 euro/muaj për t’u kualifikuar, e kështu me radhë”, ka shkruar ai, duke treguar shumën e subvencionit.
“Shuma e subvencionit të plotë shkon deri në 900 kWh/vit për një anëtar, dhe do të jetë e shpërndarë nëpër muajt e dimrit. Nëse një familje 4-anëtarëshe ka 300 euro të ardhura mujore, mund të përfitojë gjysmën subvencionit, pra 450 kWh/vit për anëtar. Nëse familja nuk ka fare të ardhura, atëherë mund të përfitojë subvencionin e plotë prej 900kWh për anëtar. Me fjalë tjera, sa më pak të ardhura të ketë familja, aq më e lartë është vlera e subvencionit, e që mund të shkojë deri në 900kWh/vit/anëtar. Në rast se familjet nuk kanë qasje në internet, apo kanë vështirësi të aplikojnë, mund të drejtohen në Qendrat për Punë Sociale për udhëzime dhe ndihmë”, ka shkruar Murati.
