“Kurti po e zbaton agjendën e Putinit, as Serbia nuk është më antiamerikane”: Haradinaj me sulm të ashpër ndaj Kurtit

Kryetari i AAK-së, Ramush Haradinaj, ka vazhduar me akuza të ashpra ndaj kryeministrit Kurti.

Ai ka thënë se Kurti është zbatues i agjendës së Putinit.

“Situata në veri sipas planit amerikan ishte që të punojmë bashkë, iu kujtohet plani i tabelave dhe të gjitha të tjerave, përfshirë edhe urën. Edhe ne sikur të punonim me planin amerikan, në veri nuk do kishim vetëm rendin e ligjin e mirë, por do ta kishin integrimin në ligj, që nënkupton serbët e Kosovës, qytetarët e veriut të ishin pjesë të ushtrisë, Policisë, gjyqësisë… me këtë integrim të plotë pos rendit dhe ligjit, ne do të kishim integrimin e plotë, në rend dhe ligj dhe pastaj integrimin politik.

“Kurti me veprimet e veta nuk e ka aplikuar planin e përbashkët Kosovë- Amerikë. Por e ka aplikuar agjendën e Rusisë, për destabilizim në rajon në emër të zbatimit të rendit dhe ligjit. Pra Kurti është zbatuesi më i mirë i agjendës ruse, agjendë të Putin”, ka thënë Haradinaj në “FIVE” të Dukagjinit.

Haradinaj akuzon Kurtin se nuk ka zbatuar këtë plan amerikan dhe në vend të kësaj ka vepruar sipas një agjende ruse që synon destabilizimin e rajonit.

Ai e ka përshkruar Kurtin si një zbatues të agjendës së Vladimir Putinit, duke theksuar se as Serbia nuk guxon të jetë më antiamerikane se Kurti.

“Ja shumë thjesht. Kush i rrezikon ushtarët amerikanë, kush e rrezikon planin amerikan për siguri në veri, kush krijon marrëdhënieve të tilla mosbesimi, kush nxit antiamerikanizëm në popullin e vet? Vetëm armiqtë e Amerikës, e kush janë ata, është Putini… dhe Serbia kur guxon, po fshehët, se nuk guxon qysh po bën Albini, as Serbia s’po guxon me qenë antiamerikan sa është Albini. Është një agjende e pastër ruse çka po bën kryeministri, në shërbim të Rusisë në emër të një rendi e ligji në veri. Që duhet të ndodh, por duhet te ndodh integrimi në rend e ligj dhe integrimi institucional”, tha ai.