Kurti: Nuk u ndalëm, por vazhduam me ndihma në disa sektorë

Kryeministri Albin Kurti dhe ministri i Financave, Punës dhe Transfereve, Hekuran Murati, kanë mbajtur konferencë për media, në të cilën shënua fillimi i pilotimit të skemës për reformën e asistencës sociale në Kosovë.

Kurti duke bërë prezantimin e punës së Qeverisë ka thënë se ka rritje e zhvillim në “çdo aspekt të jetës”.

“Qysh në shtator të viti 2021 ndihmuam me shtesat për lehona e fëmijë. Deri më tani kemi mbi 400 mijë fëmijë që përfitojnë nga këto skema. Ndamë mbi 100 milionë euro për të mbështetur pensionistët dhe për skemat tjera sociale”, ka thënë Kurti.

Ai tutje ka thënë se kanë bërë reformimin rrënjësor të sistemeve e politikave që ishin keq të dizajnuara.

“Si Qeveri nuk u ndalëm por vazhduam me ndihma në disa sektorë. Fokusi ynë ishte reformimi rrënjësor i sistemeve e politikave që ishin keq të dizajnuara. Dizajni i skemës aktuale sociale është diskriminues sepse në momentin që fëmija në një familje ka mbushur moshën 5 vjeçare atij i është ndërprerë ndihma”, ka thënë ai.

Nga ana tjetër, ministri Murati ka thënë se kanë dizajnuar një mekanizëm tjetër.

“Personat të cilët mund të jenë prind të vetëm dhe kanë fëmijë nën 18 vjeç, personat me aftësi të kufizuara, ata që kujdesen për personat me aftësi të kufizuara do të trajtohen si persona që janë në kërkim për një vend pune”, ka thënë Murati.

“Ky pilotim është i hapur dhe është në e-Kosova dhe nëpër qendrat e plotësimit dhe familjarët duhet të plotësojnë aplikimin”.