Krime kundër grave jezidi në Siri, prokuroria ngrit aktakuzë ndaj një kosovari

Prokuroria Speciale e Kosovës ka njoftuar se ka ngritur një aktakuzë ndaj shtetasi të Kosovës me inicialet M.D.

I njëjti, sipas prokurorisë, dyshohet për veprën penale krim kundër njerëzimit.

Tutje, këto krime dyshohet se ai i ka kryer kundër grave të komunitetit “jezidi”.

Njoftimi i plotë:

Prokuroria Speciale ka ngritur aktakuzë ndaj shtetasit të Kosovës me iniciale M.D., për shkak të dyshimit se ka kryer veprën penale “Krim kundër njerëzimit”, nga neni 143 i Kodit Penal të Republikës së Kosovës dhe veprën penale “Shkelje të rëndë të ligjeve dhe zakoneve që zbatohen në konfliktet e armatosura që nuk janë të karakterit ndërkombëtar, nga neni 147, paragrafi 1 dhe 2, nënparagrafët 2.6 dhe 2.23 të Kodit Penal të Republikës së Kosovës.

Sipas Prokurorisë Speciale, këto vepra u kryen ndaj vajzave dhe grave të komunitetit ‘’Yazzid’’ gjatë konfliktit në Siri dhe Irak në periudhën kohore 2014-2017 dhe se kjo çështje penale tashmë ka kaluar në kompetencë Departamentit Special të Gjykatës Themelore në Prishtinë për procedurë të mëtutjeshme.

Po ashtu, PRSK-ja njofton se i pandehuri gjendet nën masën e sigurisë - paraburgim, sipas vendimit të Gjyqtarit të Procedurës Paraprake deri në një vendim të ri nga ana e gjykatës.