KQZ: Përfundon verifikimi dhe numërimi në 22 Qendra Komunale të Numërimit, procesohen 71.65% e vendvotimeve
Komisioni Qendror i Zgjedhjeve (KQZ) ka njoftuar se procesi i verifikimit të rezultateve të subjekteve politike dhe numërimit të votave për kandidatët për deputetë nga zgjedhjet e parakohshme për Kuvendin e Kosovës, të mbajtura më 7 qershor 2026, po vazhdon në Qendrat Komunale të Numërimit (QKN).
Sipas të dhënave të publikuara të mërkurën në orën 16:00, procesi i verifikimit dhe numërimit ka përfunduar në 22 nga 38 Qendra Komunale të Numërimit. Deri tani janë procesuar 1,790 nga gjithsej 2,498 vendvotime, që përbën 71.65 për qind të numrit të përgjithshëm të vendvotimeve.
Gjatë ditës së sotme, procesi është përmbyllur edhe në nëntë komuna: Deçan, Dragash, Kamenicë, Graçanicë, Klinë, Viti, Kaçanik, Rahovec dhe Leposaviq.
Më herët, procesi kishte përfunduar në Junik, Shtërpcë, Hani i Elezit, Partesh, Mamushë, Zubin Potok, Zveçan, Kllokot, Novobërdë, Obiliq, Shtime, Ranillug dhe Mitrovicë të Veriut.
Ndërkohë, verifikimi dhe numërimi vazhdojnë në 16 QKN të tjera. Më afër përfundimit janë Istogu me 56 nga 60 vendvotime të procesuara dhe Fushë Kosova me 43 nga 62 vendvotime. Procesi është ende në zhvillim edhe në Skenderaj, Malishevë, Drenas, Lipjan, Suharekë, Vushtrri, Mitrovicë të Jugut, Podujevë, Gjilan, Pejë, Gjakovë, Ferizaj, Prizren dhe Prishtinë.
Kryeqyteti mbetet komuna me numrin më të madh të vendvotimeve për t’u procesuar, pasi deri në orën 16:00 janë verifikuar dhe numëruar 82 nga 262 vendvotime.
KQZ ka bërë të ditur se procesi po zhvillohet sipas procedurave të parapara dhe se rezultatet do të përditësohen në mënyrë periodike deri në përfundimin e plotë të verifikimit dhe numërimit në të gjitha komunat e vendit.
