Kosova zgjidhet anëtare e Komitetit Drejtues të Rrjetit Evropian për Transparencë dhe Qasje në Informata (ENTRI)
Kosova është bërë anëtare e Komitetit Drejtues të Rrjetit Evropian për Transparencë dhe Qasje në Informata (ENTRI). Kjo u zyrtarizua gjatë Konferencës Ndërkombëtare të Komisionerëve për të Drejtën e Informimit (ICIC), mbajtur më 24 qershor në Berlin.
Agjencia për Informim dhe Privatësi (AIP), përfaqësuar nga Komisionerja Krenare Sogojeva-Dermaku, ka qenë ndër institucionet që shprehën interes të veçantë për t’u angazhuar në këtë rrjet të rëndësishëm evropian. Kandidatura e Kosovës u miratua me votim unanim nga shtetet anëtare të ICIC, duke e renditur atë përkrah vendeve si Portugalia, Spanja, Franca dhe Skocia në Komitetin Drejtues. Ndërkohë, Gjermania u zgjodh si vendi kryesues i ENTRI-t.
Ky zhvillim përfaqëson një hap të madh përpara për Kosovën në përforcimin e pozitës së saj ndërkombëtare në fushën e transparencës dhe të drejtës për qasje në dokumente publike.
Rrjeti ENTRI është themeluar si një platformë bashkëpunimi ndërmjet institucioneve evropiane që mbrojnë dhe promovojnë të drejtën e qytetarëve për qasje në informata publike. Komiteti Drejtues, si organ qeverisës i rrjetit, ka për detyrë të koordinojë veprimtaritë e përbashkëta, të përgatisë dhe miratojë rezoluta, të menaxhojë procesin e anëtarësimit dhe të kryejë funksione të tjera administrative.
Në këtë rol të ri, AIP pritet të luajë një rol aktiv në shkëmbimin e praktikave më të mira ndërkombëtare, forcimin e bashkëpunimit mes institucioneve simotra dhe në ngritjen e standardeve të transparencës në qeverisje.
Përveç përfshirjes në ENTRI, AIP vazhdon të ketë një angazhim aktiv edhe si Koordinatore e Grupit Punues për Integritet të Informimit (IIWG), që përfshin mbi dhjetë shtete anëtare nga mbarë bota. Gjatë sesioneve të mbyllura të konferencës në Berlin, përfaqësues të AIP-së prezantuan arritjet e këtij grupi, duke konfirmuar përkushtimin e Kosovës për të ndjekur dhe avancuar standardet më të larta të qeverisjes së hapur dhe llogaridhënies.
Kjo arritje e re për Kosovën është një dëshmi e përkushtimit të institucioneve të saj për të ndërtuar një administratë më transparente, të hapur dhe të përgjegjshme ndaj qytetarëve.
