Konjufca pret Michael Roth-in, e falënderon për qëndrimet parimore karshi zhvillimeve aktuale
Kohëve të fundit ishte iniciatori i një letre tejet mbështetëse ndaj Kosovën, në veçanti rreth zhvillimeve në pjesën veriore të Kosovës, ku bashkërisht me afro 50 deputetë të tjerë amerikano-evropian, nisën letrët drejt Departamentit amerikan të Shtetit dhe Zyrës së Përfaqësuesit të Lartë të BE-së për Politikë të Jashtme dhe Siguri. Michael Roth, Kryesuesi i Komisionit për Punë të Jashtme në Bundestagun gjerman, sot ishte vizitë në Kosovë, ku u takua edhe me Kryetarin e Kuvendit të Kosovës, Glauk Konjufca.
Njoftimi i Kuvendit të Kosovës:
Kryetari Glauk Konjufca priti në takim deputetin gjerman, Michael Roth
Kryetari i Kuvendit të Republikës së Kosovës, Glauk Konjufca, i shoqëruar nga shefi i Kabinetit Ilir Kërçeli dhe këshilltarët, ka pritur sot në takim deputetin Michael Roth, njëherësh kryetar i Komisionit për Punë të Jashtme në Bundestagun gjerman.
Gjatë takimit u bisedua për zhvillimet politike në vend dhe rajon, proceset integruese, mundësitë e bashkëpunimit dhe shkëmbimit të përvojave parlamentare, si dhe çështje të tjera me interes të përbashkët.
Kryetari Konjufca i shprehu mirënjohje deputetit Roth për angazhimin dhe qëndrimet e tij parimore karshi zhvillimeve aktuale në rajonin tonë, si dhe për mbështetjen që Gjermania i ka dhënë dhe vazhdon t'i jep Kosovës në të gjitha fazat e shtetndërtimit e të integrimit në institucionet euro-atlantike dhe organizata e mekanizma ndërkombëtarë.
Duke i vlerësuar të shkëlqyera marrëdhëniet dypalëshe, Kryetari i Kuvendit po ashtu theksoi se Gjermania mike është aleat strategjik dhe partner i rëndësishëm i Republikës së Kosovës. Njëkohësisht ai shprehu gatishmërinë për forcimin e mëtejmë të bashkëpunimit të ndërsjellë dhe e vlerësoi shumë të rëndësishme përkrahjen e Gjermanisë kundrejt proceseve të cilat i ka përpara shteti ynë.
Ndërsa deputeti dhe kryetari i Komisionit për Punë të Jashtme në Bundestagun gjerman, Michael Roth, e falënderoi kryetarin Konjufca për pritjen, duke rikonfirmuar mbështetjen e Republikës Federale të Gjermanisë për Republikën e Kosovës.
