Komandanti i KFOR-it: Nëse krijohen barrikada, do të veprojmë

Komandanti i KFOR-it, Ferenc Kajari, diskutoi situatën e sigurisë në Kosovë, veçanërisht në veri të vendit, si dhe potencialin për trazira në rast se Kosova dhe Serbia nuk arrijnë të arrijnë një marrëveshje për zbatimin e vendimit të Qeverisë së Kosovës për regjistrimin e automjeteve dhe letërnjoftimeve për shtetasit serbë.

Këto fjalë janë të intervistës së realizuar për RTK-në që do të transmetohet sonte në ora 20:20 në “RTK Prime”, shkruan RTKlive.

Ndërsa tha se pret që negociatat e vazhdueshme të rezultojnë në një marrëveshje, komandanti i KFOR-it besoi se gjendja e sigurisë në pjesën veriore është përmirësuar pas ngjarjeve të fundit.

“KFOR-i ka vendosur pikat e vrojtimit dhe pikat e kontrollit teknik në të gjithë hapësirën. Po ashtu, kemi rritur edhe aktivitetin patrullues në gjithë rajonin. Këto masa janë marrë për të qenë në gjendje për çfarëdolloj incidenti dhe për një siguri më të madhe. Nëse ka tensione, ne do të veprojmë sipas mandatit tonë”, ka thënë Kajari.

Ai pohoi se KFOR-i nuk do të lejojë barrikada rrugore pasi që Rezoluta 1244 i cakton KFOR-it në Kosovë dy detyra të rëndësishme: "Të ruajë sigurinë dhe rendin në Kosovë dhe të mbrojë të drejtën e secilit për lëvizje të lirë."

“Nëse krijohen barrikada kjo e pengon lëvizjen e lirë dhe nëse nuk arrihet marrëveshja, atëherë do të arrijmë në një moment ku KFOR-i do të duhet të veprojë për të mundësuar lirinë e lëvizjes”, ka pohuar Kajari.