Ish-paramilitari serb arrestohet në Poloni, i akuzuar për krime lufte në Kroaci
Një ish-anëtar i një njësie paramilitare serbe, i akuzuar për krime lufte ndaj civilëve kroatë gjatë shpërbërjes së ish-Jugosllavisë, është arrestuar në Poloni, kanë konfirmuar prokurorët polakë, raportoi TVP.
I dyshuari, i identifikuar si Zivko Z. sipas ligjeve të privatësisë në Poloni, u ndalua në aeroportin “Chopin” të Varshavës mbi bazën e një urdhër-arresti evropian të lëshuar nga një gjykatë në Zagreb. Mediat ballkanike raportojnë se ai u arrestua më 16 tetor, ndërsa po udhëtonte nga Serbia drejt Kanadasë, ku jeton që nga viti 1992.
Sipas autoriteteve, Zivko Z. ishte pjesë e forcave paramilitare serbe gjatë Luftës së Pavarësisë së Kroacisë dhe akuzohet se ka urdhëruar e marrë pjesë personalisht në torturimin dhe vrasjen e civilëve në Grubishno Polje, mes gushtit dhe tetorit 1991. Ai dyshohet gjithashtu se nuk ka ndaluar vartësit e tij nga kryerja e krimeve, në rolin e tij si “komisar politik” i njësisë Bilogora.
Prokurorët thanë se 79-vjeçari ka dy shtetësi, serbe dhe kanadeze, dhe se kishte ndaluar tetë civilë, të cilët u mbajtën dhe u torturuan në një burg të improvizuar. Ai dyshohet se ka qëlluar njërin prej tyre, duke i shkaktuar plagë të rënda pas një tentative arratisjeje.
Zivko Z. ka mohuar fajësinë gjatë marrjes në pyetje.
Zëdhënësi i prokurorisë në Varshavë, Piotr Antoni Skiba, konfirmoi se kërkesa për ekstradim në Kroaci është dorëzuar në gjykatën rajonale të Varshavës dhe është kërkuar zgjatja e paraburgimit. Ai mund të përballet me deri në 20 vjet burgim sipas ligjeve kroate, ose pesë deri në 25 vjet sipas sistemit penal polak.
Sipas Euronews Serbia, Zivko Z. është një nga 24 luftëtarë serbë të akuzuar këtë vit për krime të ngjashme në Grubishno Polje.
