Dodik, serbi pro-rus i Bosnjës, kërcënon përsëri me shkëputje të Republikës Serbe

Një javë pasi zgjedhjet e përgjithshme të vendit të ndarë etnikisht, treguan se partia e tij vazhdon të mbizotërojë mes serbëve, udhëheqësi separatist serb i Bosnje dhe Hercegovinës Milorad Dodik, ka përmendur përsëri mundësinë e një shkeputje të Republikës Serbe, shkruan Zëri i Amerikës.

Kur Dodik, një udhëheqës pro-rus, u përpoq të largonte Republikën Serbe nga institucionet e rëndësishme shtetërore, duke përfshirë gjykatën, sistemin e taksave dhe forcat e armatosura të bashkuara dhjetorin e kaluar, ai shkaktoi krizën më të madhe politike në Bosnje që nga lufta.

Dodik u tërhoq, duke pretenduar në atë kohë se ai po e shtynte por nuk e braktiste idenë përballë sanksioneve të SHBA-së dhe Britanisë dhe një pranie ndërkombëtare në rritje në Bosnje dhe Hercegovinë.

Në një konferencë shtypi në Beograd, z. Dodik përsëriti kritikën e tij ndaj sistemit aktual politik në Bosnje, duke e quajtur atë një sistem të prishur që të huajt e kishin imponuar.

Bosnja u nda në dy territore autonome, Republika Serbe dhe Federata e ndarë mes kroatëve dhe boshnjakëve , të lidhura nga një qeveri e pasigurt kombëtare, si rezultat i marrëveshjeve të paqes të Dejtonit që i dhanë fund luftës së viteve 1992-1995.

"Ne e kemi krijuar Republikën Srpska si një shtet të pavarur dhe nuk e kemi pranuar kurrë Bosnjën si një shtet të përbashkët," tha Dodik.

"Bosnja duhet t’i kthehet kushtetutës (origjinale). Nëse kjo nuk është e mundur, ajo duhet të shpërbëhet," tha ai.

Z. Dodik, i cili mburret për miqësinë e tij me Vladimir Putinin e Rusisë dhe Viktor Orbanin e Hungarisë, shpalli fitoren e partisë së tij në të gjitha zgjedhjet, përfshirë atë për president të Republikës Serbe.

Një koalicion i partive opozitare e ka akuzuar atë për ndërhyrje në zgjedhjet presidenciale dhe ka kërkuar një rinumërim. Ata zhvilluan protesta në kryeqytetin de fakto të rajonit Banja Luka.