Bislimi për takimin me Lajçak në Vjenë: Biseduam edhe për pasaportat e paligjshme të lëshuara nga Serbia
Zëvendëskryeministri i Kosovës, Besnik Bislimi, ka shkruar në platformën “X” për takimin në Vjenë me të dërguarin e BE-së për dialogun, Miroslav Lajçak.
Bislimi ka theksuar se me Lajçakun kanë biseduar disa tema të rëndësishme.
“Biseduam për nevojën e zbatimit të plotë dhe të shpejtë të udhërrëfyesit të energjisë dhe çështjet në lidhje me lirinë e lëvizjes, për letrën e Beogradit për tërheqje nga marrëveshja”, shkruan Bislimi.
Ai shtoi se në takim janë ngritur edhe çështje të tjera lidhur me urgjencën për zbatimin e plotë dhe të pakushtëzuar të Marrëveshjes Themelore, duke theksuar se njohja e pasaportave të paligjshme të Serbisë do ta dëmtoj rëndë dialogun.
“Theksova se shtytja e propozimit për njohjen e pasaportave të paligjshme të lëshuara nga Serbia, ndikon negativisht në procesin integrues dhe dëmton rëndë dialogun”, shkroi Besnik Bislimi.
