BE-ja e fut Gardën Revolucionare të Iranit në listën e organizatave terroriste
Bashkimi Evropian e ka futur Gardën Revolucionare të Iranit në listën e organizatave terroriste si kundërpërgjigje ndaj shtypjes vdekjeprurëse ndaj protestuesve në javët e fundit.
Kryediplomatja e BE-së, Kaja Kallas, tha se ministrat e jashtëm të vendeve të Bashkimit Evropian e bënë “hapin vendimtar” për shkak se “shtypja nuk mund të kalojë pa përgjigje”, raporton televizioni BBC.
Ajo tha para vendimit se kjo lëvizje do ta vendosë Rojën Revolucionare të Iranit në nivelin e njëjtë me grupet si ISIS-i dhe al-Qaeda.
Grupet për të drejtat e njeriut vlerësojnë se mijëra protestues janë vrarë nga forcat iraniane të sigurisë, përfshirë Rojat Revolucionare, gjatë trazirave në dhjetor e janar.
Duke folur të enjten në Bruksel, ministri i Jashtëm i Francës, Jean-Noel Barrot, e përshkroi këtë ngjarje si “shtypja më e dhunshme në historinë moderne të Iranit” dhe tha se “nuk mund të ketë pandëshkueshmëri për krimet e kryera”.
Franca më parë kishte shprehur ngurrim për ta vendosur Rojën Revolucionare të Iranit në listën e BE-së për organizata terroriste nga frika se një veprim i tillë do të mund t’u jepte fund të gjitha lidhjeve diplomatike me Teheranin.
