Bastisja në Ministrinë e Bujqësisë: A ia arrestoi Pecit policia "punëtorin e vitit"?
Gjatë ditës së enjte ka pasur bastisje në Ministrinë e Bujqësisë, e cila drejtohet nga Faton Peci. Bashkë me zyrtarët policorë, nga objekti është parë duke dalë edhe një zyrtar i këtij institucioni, Bedri Dobra.
Nuk dihet ende nëse Dobra është arrestuar, megjithatë, edhe në pamjet e Nacionales ai shihet i shoqëruar për në veturë nga zyrtarët policorë.
Në vitin që lamë pas, Peci e kishte shpallur Dobrën si “Punëtori i vitit”.
Ai sipas një postimi të Ministrisë së Bujqësisë, ka qenë ushtrues detyre i shefit të Divizionit për Përkrahje Direkte, Politika Tregtare dhe Tregje.
“Bedri Dobra - Punëtori i vitit në MBPZHR!
Profesionalizmi, përkushtimi, vullneti, dëshira dhe gatishmëria për të gjetur zgjidhje; e karakterizojnë një zyrtar si Bedriu” – thuhej në këtë postim.
Sipas gazetarit Lirim Mehmetaj, Dobra u mor nga policia pas bastisjes.
Nacionale ka kontaktuar Policinë e Kosovës dhe Prokurorinë për të mësuar më shumë detaje rreth këtij rasti, megjithatë, deri në këto momente nuk kemi marrë përgjigje.
Për më shumë, ndiqeni videon më poshtë:
