Arrestohet një person në Suharekë, dyshohet se plagosi djalin me armë zjarri
Një person është arrestuar në Suharekë nën dyshimet për dhunë në familje, armëmbajtje pa leje dhe përdorim të armës.
Sipas Policisë, rasti ka ndodhur më 1 gusht, pas një mosmarrëveshjeje familjare, kur i dyshuari dyshohet se ka qëlluar me armë djalin e tij.
Në vendin e ngjarjes është konfiskuar një pistoletë me pesë fishekë.
Viktima po trajtohet në Spitalin e Prizrenit, ndërsa i dyshuari është dërguar në mbajtje me vendim të prokurorit.
