Aksident mes cisternës e kamionit të mbushur me njerëz e gjedhe, 48 të vdekur në Nigeri
Së paku 48 persona kanë vdekur në shtetin qendror Nigerian, Niger, pasi një cisternë me naftë u përplas me një kamion që po barte njerëz dhe gjedhe, ka thënë agjencia për menaxhimin e fatkeqësive.
Agjencia Shtetërore për Menaxhimin e Emergjencave tha se përplasja ndodhi rreth orës 00:30 sipas kohës lokale të dielën dhe shkaktoi një shpërthim që i përfshiu të dyja automjetet, raporton televizioni BBC.
Drejtori i përgjithshëm i kësaj agjencie, Abdullahi Baba-arah, tha se ekipet e reagimit janë dislokuar në vendin e ngjarjes për ta menaxhuar situatën. Nga shpërthimi i zjarrit u prekën edhe disa automjete të tjera.
Në pamje nga vendi i ngjarjes pak pas aksidentit shihen dy automjetet e djegura tërësisht dhe disa gjedhe të ngordhura.
Duke folur për agjencinë “Reuters” pas rastit, një punëtor i ekipeve të shpëtimit tha se ata po punonin për nxjerrjen e trupave të njerëzve dhe gjedheve që ende ndodheshin brenda kamionit.
Shpërthimet dhe aksidentet me cisterna janë të zakonshme të Nigeri, pjesërisht për shkak të gjendjes së dobët të rrugëve.
