Abdixhiku kërkon edhe transformim ideologjik, del me thirrje për “ngritje të djathtë gjithënacionale”
Kryetari i Lidhjes Demokratike të Kosovës, Lumir Abdixhiku, me ç’duket nga germat dhe fjalët kohëve të fundit, problemin e sheh edhe në “ideologjinë” kundërshtare të pushtetit aktual, deklarativisht ndonëse përmbajtësisht jo, “të majtë” për çka bëri thirrje për të kundërtën: për “ngritje të djathtë gjithënacionale”.
“LDK po mbledhë rrerh vetes njerëzit më të mirë të vendit, si thirrje për ngritje të djathtë gjithënacionale, si domosdoshmëri për t’i dhënë vendit të ardhme!”, ka shkruar Lumir Abdixhiku pas një vizite në Obliqi ku shënuan 34 vjetorin e degës së LDK-së.
Reagimi i Abdixhikut:
Në Obiliq, së bashku me Kryetarin e Degës dhe Komunës, z. Xhafer Gashin, shënuam përvjetorin e 34-të të themelimit të Degës. Mes mirënjohjeve të dhëna për kontributin e gjeneratave të tëra, shtruam thirrjen tonë për të tashmen sikurse dhe vizionin tonë drejt së ardhmes.
LDK po mbledhë rrerh vetes njerëzit më të mirë të vendit, si thirrje për ngritje të djathtë gjithënacionale, si domosdoshmëri për t’i dhënë vendit të ardhme!
Kosova është shumë e pasur për të qenë e fundit në Evropë. Për të qenë kaq e zbrazët e për të qenë kaq e zymtë. Kosova ka plot njerëz punëtorë, familje të ndershme, biznese të shëndosha, mësues me ideale, mjek me pasion, shërbyes me dinjitet. Kosova ka tradita të pasura që duhet t’i kultivojë me fanatizëm, e ka potenciale të jashtëzakonshme që duhet t’i shfrytëzojë me plot përkushtim.
Popullistët këtë nuk kanë brengë. Fillimsiht sepse nuk e besojnë Kosovën, e shohin si të përkohshme; e më pas sepse kanë tjetër synim. Ata brengë kanë mirëmbajtjen e vetes. Sa vota sjellë një vendim. Dhe në këtë mirëmbajtje kanë mbetur të kurthuar në përballjen me të shkuarën. Aty qëndrojnë me mburrje e krenari, por aty Kosova s’duron të qëndrojë më.
