Abbott tregon se Cameron takoi familjarët e personave të zhdukurve: Dëgjoi rrëfimet prekëse

David Cameron, ministër i Punëve të Jashtme i Britanisë së Madhe, dje ka qëndruar në Kosovë, ku dha shumë mesazhe të rëndësishme në lidhje me të ardhmen dhe sigurinë e Kosovës.

Në lidhje me këtë vizitë, ka shkruar edhe Nicholas Abbott, ambasador i Britanisë së Madhe në Kosovë.

Në postimin e tij, ai ka treguar se Cameron ka takuar familjarët e personave të zhdukur dhe një të mbijetuar të dhunës seksuale të luftës së fundit.

“Por isha veçanërisht i kënaqur që Lord Cameron ishte gjithashtu në gjendje të dëgjonte dëshmitë prekëse të anëtarëve të familjes së të zhdukurve, si dhe takimin me një të mbijetuar të dhunës seksuale të lidhur me konfliktin. Ai dëgjoi nga dora e parë për rëndësinë e mbështetjes së qëndrueshme për të mbijetuarit dhe trajtimin e stigmës, si dhe nevojën urgjente për të zhbllokuar bashkëpunimin rajonal për personat e zhdukur për t'u siguruar familjeve të të zhdukurve mbyllje dhe llogaridhënie.” – shkroi Abbott, ndër të tjera.

Ai ka treguar se Cameron ka vizituar edhe Manastirin e Graçanicës.