6 gusht, ora 10:00: Haxhiu fton deputetët në seancën konstituive të Kuvendit të Kosovës

Albulena Haxhiu ka ftuar deputetët e zgjedhur në seancën konstituive të Kuvendit të Kosovës, e cila do të mbahet të enjten, më 6 gusht.

Sipas njoftimit, seanca do të nisë në orën 10:00 dhe do të zhvillohet në sallën plenare të Kuvendit të Kosovës.

Në ftesën drejtuar deputetëve, Haxhiu u ka bërë thirrje të gjithë anëtarëve të legjislaturës së re që të marrin pjesë në këtë seancë, duke bërë të ditur se rendi i ditës është bashkëngjitur në dokumentin zyrtar.

Në rend dite janë paraparë:

• Betimi i deputetëve;
• Zgjedhja e kryetarit të Kuvendit;
• Zgjedhja e nënkryetarëve të Kuvendit.

Seanca konstituive pritet të shënojë fillimin e punës së legjislaturës së re të Kuvendit të Kosovës.

Data e mbajtjes së kësaj seance ishte caktuar më herët nga Haxhiu në cilësinë e ushtrueses së detyrës së presidentes.

Në vendimin e saj thuhet se, duke u mbështetur në nenet përkatëse të Kushtetutës së Republikës së Kosovës, Ligjin për Presidentin dhe vendimin e Komisionit Qendror të Zgjedhjeve për certifikimin e rezultateve përfundimtare të zgjedhjeve të parakohshme parlamentare të 7 qershorit 2026, është vendosur që mbledhja e parë e Legjislaturës së Njëmbëdhjetë (XI) të Kuvendit të Republikës së Kosovës të mbahet më 6 gusht 2026, duke filluar nga ora 10:00.