Zgjedhjet parlamentare në Greqi: Shtatë kandidatë shqiptarë në garë
Zgjedhjet parlamentare po mbahen sot në Greqi, ndërsa mbi 9 milionë e 800 mijë qytetarë pritet t’i drejtohen sot kutive të votimit.
Ministria e Brendshme greke deklaroi se procesi i votimit nisi me diasporën, ku 16827 grekë që jetojnë jashtë vendit dhe që kishin shprehur dëshirën të votojnë, iu drejtuan kutive të votimit në ambasada, shkolla dhe biznese.
Kutitë e votimit dhe materialet zgjedhore të shpërndara në 35 shtete të ndryshme të botës, mbërritën gjatë orëve të para të mëngjesit në Athinë ku edhe do të numërohen sapo të nisë procedura e numërimit.
Votimi është i detyrueshëm për të gjithë personat deri në moshën 70 vjeç si dhe për ata që jetojnë jo më larg se 120 km nga banesa e tyre.
Deri tani nuk ka pasur dënime ose penalitete për ata që kanë zgjedhur të mos paraqiten në votime. Autoritet u bëjnë thirrje votuesve të marrin pjese në proces për të votuar një prej 40 partive ose formacioneve politike të regjistruara.
Favorit për fitore janë konservatorët e Kyriakos Mitsotakis, të ndjekur prej radikalëve të majtë “Syriza” të Alexis Tsipras, ndërsa rol të rëndësishëm në formimin e qeverisë së re pritet të ketë edhe PASOK që kryesohet nga Nikos Andrulaqis.
Edhe këtë vit kandidojnë shtetas grekë me origjinë shqiptare, të cilët kryesisht aderojnë në partitë e së majtës greke.
Cilët janë shtatë kandidatët shqiptarë në Greqi
Dy prej kandidatëve, Fatos Malaj dhe Niko Bilika kandidojnë për partinë PASOK, njëri në Athinë dhe tjetri në Selanik. Ndërsa tre kandidatë të tjerë Adiljan Koxhaj, Makrina Koci dhe Angjelos Jahollari konkurrojnë me Partinë “Syriza” në Selanik dhe Evia.
Sidorela Kalthi garon për Partinë Komuniste greke në Kretë dhe Paty Vardhami kandidon në Athinë me nismën “MERA 25”.
Shumica e kandidatëve nga komuniteti shqiptar janë të rinj të talentuar nga brezi i dytë i emigrantëve që janë arsimuar në Greqi dhe Angli dhe janë përfshirë në jetën politike greke.
