Vapë rekorde për muajin qershor në Pekin, temperatura shkon në 40,7 gradë
Temperatura në Pekin të Kinës shkoi në mbi 40 gradë të enjten, për herë të parë që nga viti 2014, duke e thyer rekordin për ditën më të nxehtë në qershor. Vala e vapës, që e preku pjesën veriore të Kinës para një jave, pritet që të vazhdojë edhe gjatë fundjavës.
Në një stacion për motin në periferinë jugore të Pekinit u regjistrua temperatura 40,7 gradë në orën 14 e 30 minuta, sipas byrosë komunale të motit, duke e shënuar kalimin e parë të vapës prej 40 gradësh që nga 29 maji i vitit 2014, raporton agjencia “Reuters”.
E enjtja ishte dita më e nxehtë në muajin qershor në Pekin që nga fillimi i regjistrimit modern të të dhënave meteorologjike. Rekordi i mëparshëm ishte regjistruar më 10 qershor 1961, kur temperatura kishte shkuar në 40,6 gradë Celsius.
Më herët të enjten, autoritetet e qytetit me gati 22 milionë banorë e shpallën alarmin e portokalltë, që është paralajmërimi i shkallës së dytë më të lartë, duke thënë se temperatura mund të shkojë deri në 39 gradë në disa pjesë të qytetit nga e enjtja deri të shtunën.
Pekini, Tianjini, Hebei dhe Shandongu në pjesët veriore dhe lindore të Kinës u ballafaquan me një valë vape javën e kaluar, duke i nxitur autoritetet që t’i shtonin përpjekjet për t’i mbrojtur të mbjellat, për ta garantuar sigurinë e turistëve dhe për ta pezulluar punën në mjedis të hapur gjatë pjesës më të nxehtë të ditës.
Sipas Administratës Meteorologjike të Kinës, vala më e re e vapës, që ka rënë në kohën e një feste atje, do t’i prekë edhe rajonet e Mongolisë së Brendshme në veri dhe Xinjiangun në perëndim.
