Ukraina raporton për tre të vrarë e 10 të plagosur nga sulmi raketor rus në rajonin Kharkiv
Një sulm raketor rus ndaj qytetit lindor ukrainas, Balakliia, la të vrarë tre njerëz, ndërsa tre adoleshentë ishin në mesin e dhjetë të plagosurve, thanë të hënën zyrtarët rajonalë në Kharkiv.
Sulmi që u krye natën dëmtoi blloqe shumëkatëshe banesore dhe shkatërroi shumë veture në qendrën e qytetit, tha në rrjetin “Telegram” guvernatori i rajonit që kufizohet me Rusinë, Oleh Synehubov, raporton agjencia e lajmeve “Reuters”.
Një fotografi e publikuar nga autoritetet rajonale e shfaqte fasadën e dëmtuar të një ndërtese shumëkatëshe me dritare të thyera, përderisa në katet e sipërme shihej zjarr e në tokë kishte mbetje e degë të thyera të drurëve.
Vitali Karabanov, drejtor i administratës ushtarake në Balakliia, tha se në mesin e të lënduarve kishte adoleshentë, ndërsa nëntë prej të plagosurve u pranuan në spital.
Rusia nuk bëri komente të menjëhershme për sulmin. Agjencia “Reuters” nuk mundi t’i vërtetonte në mënyrë të pavarur komentet e zyrtarit ukrainas.
Forcat ruse kanë kryer sulme të rregullta me raketa, dronë e artileri ndaj qytetit të dytë më të madh të Ukrainës, Kharkiv, duke goditur shtëpi e infrastrukturë, duke i dëmtuar linjat e energjisë e duke i bërë banorët subjekt të alarmeve të vazhdueshme për sulme ajrore.
Të dyja palët mohojnë se i vënë në shënjestër civilët në luftën që Rusia e nisi para gati katër vjetëve, por mijëra janë vrarë në konflikt – shumica dërrmuese ukrainas.
Disa pjesë të rajonit Kharkiv dhe qyteti Izyum në jug nuk kishin rrymë gjatë natës./Nacionale
