Ukraina e dënon me burgim të përjetshëm për vrasje ushtarin rus, Dmytro Kurashov

Një gjykatë ukrainase të enjten dënoi me burgim të përjetshëm një ushtar rus, pasi e shpalli fajtor për vrasjen e një të burgosuri ukrainas të luftës. Kjo është hera e parë që Ukraina dënon një të akuzuar për akuza të tilla.

Gjykata në qytetin Zaporizhia e shpalli 27-vjeçarin Dmitry Kurashov fajtor për vrasjen e ushtarit ukrainas, Vitalii Hodniuk, i cili ishte dorëzuar në janarin e vitit 2024, kur gropa ku ndodhej ishte kapur nga forcat ruse, raporton agjencia e lajmeve “Reuters”.

Kurashovi, i cili ishte burgosur nga forcat ukrainase bashkë me ushtarë të tjerë rusë pak kohë pas incidentit, u deklarua fajtor në gjykatë, edhe pse më vonë u tha gazetarëve se ishte i pafajshëm dhe donte që të lirohej përmes shkëmbimit të të burgosurve.

Ai i tha agjencisë “Reuters” se nuk planifikon që ta apelojë vendimin. Dënimi i tij bart peshë simbolike për Ukrainën, e cila thotë se forcat ruse kanë ekzekutuar shumë të burgosur ukrainas të luftës.

Rusia, e cila e nisi pushtimin e plotë të Ukrainës në shkurtin e vitit 2022, i mohon akuzat se trupat e saj kryejnë krime lufte.

Misioni Vëzhgues i të Drejtave të Njeriut i OKB-së tha në shkurt se kishte regjistruar “rritje alarmante” të ekzekutimeve të raportuara të ushtarëve ukrainas të kapur nga forcat ruse në muajt paraprakë.

E drejta ndërkombëtare humanitare e ndalon ekzekutimin e të burgosurve dhe të të plagosurve të luftës dhe e cilëson këtë akt si krim lufte.

Zyra e Prokurorit të Përgjithshëm të Ukrainës i tha agjencisë “Reuters” se ishin duke u zhvilluar hetime penale për vrasjen e 322 ushtarëve ukrainas, të cilët i kishin ulur armët pa kushte ose ishin dorëzuar që nga fillimi i luftës./Nacionale