Ukraina dhe Rusia shkëmbejnë të burgosur lufte të plagosur dhe të sëmurë
Ukraina dhe Rusia të enjten shkëmbyen një grup tjetër të të burgosurve të luftës të sëmurë dhe të plagosur, thanë zyrtarë nga të dyja vendet.
Të gjithë ushtarët ukrainas të shkëmbyer kanë nevojë për trajtim, tha presidenti i Ukrainës, Volodymyr Zelensky, në një shkrim të publikuar në rrjetin “Telegram”, në të cilin nuk dha hollësi për numrin e trupave të shkëmbyera, raporton agjencia e lajmeve “Reuters”.
Kievi dhe Moska u pajtuan për të shkëmbyer një numër të madh të të burgosurve të luftës dhe të trupave të mijëra ushtarëve të vdekur gjatë bisedimeve në Stamboll më herët këtë muaj.
Nga ajo kohë, Rusia dhe Ukraina kanë shkëmbyer dhjetëra të burgosur lufte, duke u përqendruar te të rinjtë nën moshën 25-vjeçare, të plagosurit rëndë dhe të sëmurët. Ka shpresë se këto mund të bëhen shkëmbimet më të mëdha të të burgosurve të luftës që nga fillimi i konfliktit në shkurt të vitit 2022.
Ministria e Mbrojtjes e Rusisë tha se një grup i trupave ruse janë kthyer nga Ukraina dhe janë futur në Bjellorusi, në përputhje me marrëveshjet e 2 qershorit.
“Atyre po u ofrohet mbështetja e nevojshme psikologjike dhe mjekësore” – tha kjo ministri në një shkrim të publikuar në rrjetin “Telegram”.
Të mërkurën, Ukraina tha se i kishte sjellë në atdhe trupat e 1.212 ushtarëve të vrarë në luftën me Rusinë. Ndihmësi i Kremlinit, Vladimir Medinsky, tha se Ukraina i kishte kthyer trupat e 27 ushtarëve rusë./Nacionale
