Udhëheqësi Suprem i Iranit zotohet për "hakmarrje" për vrasjen e babait të tij

Udhëheqësi Suprem i Iranit, Mojtaba Khamenei, ka deklaruar se duhet të merret "hak" për vrasjen e babait të tij, Ajatollah Ali Khameneit, nga Shtetet e Bashkuara dhe Izraeli.

“Hakmarrja është kërkesë e kombit tonë dhe duhet të realizohet patjetër”, thuhet në një deklaratë të publikuar nga agjencia e lajmeve Fars, e lidhur me shtetin, dhe e atribuuar atij.

“Ne zotohemi se do të hakmerremi për gjakun tuaj të pastër dhe për gjakun e të gjithë dëshmorëve të këtyre dy luftërave ndaj vrasësve kriminalë dhe të turpëruar,” thuhet në deklaratë, duke iu drejtuar liderit të ndjerë. “Këta kriminelë, emrat e të cilëve nga lart deri poshtë janë të njohur dhe të dokumentuar, do ta marrin me vete në varr dëshirën e tyre për të vdekur të qetë, në pleqëri dhe në shtratin e tyre. Ata duhet ta dinë se kjo çështje nuk varet nga ekzistenca ime apo e zyrtarëve të tjerë”, ka thënë ai sipas CNN.

Sipas deklaratës, ky zotim për hakmarrje do të përmbushet “së shpejti”, pavarësisht nëse “ne jemi të pranishëm apo jo”.

Ky paralajmërim erdhi vetëm disa orë pasi presidenti amerikan Donald Trump kërcënoi se do ta “shkatërronte” Iranin nëse ai do të përpiqej ta vriste.

Së fundmi, operativë të inteligjencës izraelite i kanë bërë të ditur administratës Trump për kërcënime të dyshuara për atentat ndaj presidentit amerikan. Sipas një burimi izraelit dhe një zyrtari amerikan, këto kërcënime pasqyrojnë dëshirën e disa fraksioneve të udhëheqjes së linjës së ashpër në Teheran. Megjithatë, dy burime amerikane të njohura me çështjen kanë deklaruar se vlerësimet më të fundit të inteligjencës amerikane nuk tregojnë ndonjë plan të ri dhe konkret iranian për të vrarë Trumpin, por vetëm raportime të vazhdueshme se aktorë të ndryshëm iranianë shprehin dëshirën për ta bërë një gjë të tillë.

Udhëheqësi i ri suprem ende nuk është shfaqur publikisht që nga emërimi i tij.

Besohet se ai është plagosur gjatë sulmit të muajit shkurt nga Izraeli dhe Shtetet e Bashkuara, në të cilin u vranë babai, nëna dhe bashkëshortja e tij. Që nga fillimi i luftës, ai ka qëndruar i fshehur, duke komunikuar me mbështetësit vetëm përmes deklaratave me shkrim, pa u shfaqur asnjëherë në publik dhe pa përdorur zërin e tij.