Turqia thotë se ka vrarë 15 militantë kurdë në Siri dhe Irak
Turqia tha të martën se kishte vrarë 13 militantë kurdë në pjesën veriore të Sirisë dhe dy të tjerë në Irak, shenjë se Ankaraja e ka vazhduar fushatën kundër këtyre luftëtarëve, disa me lidhje të mundshme me aleatët e ShBA-së, që nga koha kur republikani Donald Trump u rikthye në Shtëpinë e Bardhë javën e kaluar.
Ministria e Mbrojtjes e Turqisë tha se luftëtarët kurdë që i kishte “neutralizuar” në Siri ishin pjesë e Partisë së Punëtorëve të Kurdistanit (PKK) dhe militantëve kurdë sirianë të grupit YPG, raporton agjencia e lajmeve “Reuters”.
Turqia i konsideron PKK-në dhe YPG-në si të njëjta, por Shtetet e Bashkuara i konsiderojnë ato si grupe të ndara, duke e cilësuar si grup terrorist PKK-në, ndërsa e kanë rekrutuar YPG-në si aleate kryesore në Siri në fushatën kundër ISIS-it.
Ankaraja për një kohë të gjatë i ka bërë thirrje Uashingtonit që ta tërheqë mbështetjen për YPG-në dhe ka shprehur shpresë se presidenti Trump do ta rishikojë politikën e trashëguar nga administrata e kaluar e ish-presidentit Joe Biden.
Raporti i së martës për përleshje domethënëse ishte i dyti brenda disa ditëve. Turqia gjithashtu raportoi se kishte vrarë 13 militantë kurdë të dielën.
Forcat turke dhe aleatët e tyre në Siri në mënyrë të përsëritur kanë luftuar me militantë kurdë atje që nga rrëzimi i presidentit Bashar al-Assad muajin e kaluar.
