Pamje: Trumpi s’e lë rehat Bidenin as në pension, tallet dy herë me të brenda disa sekondave

Edhe pse kanë kaluar më shumë se katër muaj nga zgjedhjet presidenciale në ShBA, kur e mposhti, duket se presidentit amerikan, Donald Trump, nuk i ka kaluar ende inati me paraardhësin e tij në Shtëpinë e Bardhë, Joe Biden.

Republikani miliarder për disa çaste tingëlloi sikur të ishte ende në opozitë, pasi e përdori fjalorin që zakonisht i dëgjohej në tubimet e fushatës, në të cilat tallej me demokratin Biden.

Përderisa po bëhej gati të shikonte nga afër një veturë elektrike “Tesla”, e prodhuar nga kompania e miliarderit dhe aleatit të tij, Elon Musk, Trumpi u tall dy herë brenda disa sekondave me Bidenin, më saktësisht me aftësitë e tij njohëse dhe fizike, të cilat në muajt e fundit të demokratit në pushtet kishin marrë vëmendje të madhe.

Përderisa nxori nga xhepi i xhaketës disa letra, Trumpi para gazetarëve tha: “A i dëshironi shënimet e mia? Më dhanë shënime. U thashë: Unë nuk jam Bideni, s’kam nevojë për shënime.”

Pas disa sekondave, kur po dilte nga vetura, presidenti amerikan pyeti dhe u përgjigj: “A mendoni se Bideni do të mund të hynte në këtë veturë? Unë uk mendoj.”