Trumpi aktivizon kompetenca emergjente për ta rritur prodhimin e mineraleve kritike
Presidenti amerikan, Donald Trump, ka vënë në fuqi kompetenca të jashtëzakonshme për ta shtuar prodhimin vendës të mineraleve kritike, përderisa po mundohet që ta zvogëlojë varësinë e ShBA-së nga importet prej shteteve si Kina.
Urdhri ekzekutiv, i cili shfrytëzon legjislacion të periudhës së Luftës së Ftohtë, udhëzon agjenci qeveritare, përfshirë Departamentin e Mbrojtjes, që t’i bëjnë prioritet projektet e minierave si dhe ofrimin e mbështetjes teknike dhe financiare për rritjen e prodhimit të mineraleve kritike, raporton televizioni BBC.
Kjo masë vjen në kohën e eskalimit të një lufte tregtare me Kinën, e cila ka kontroll dërrmues mbi zinxhirin furnizues të disa mineraleve kritike.
Vitin e kaluar, Pekini e ndaloi shitjen e disa mineraleve kritike në ShBA, duke i detyruar kompanitë amerikane që të kërkonin burime të tjera të lëndëve jetike.
“Siguria jonë kombëtare dhe ekonomike tani është e rrezikuar në mënyrë akute nga varësia jonë nga prodhimi minerar i fuqive të huaja armiqësore” – thuhet në urdhrin ekzekutiv, përcjell gazeta "Nacionale".
“Është urgjente për sigurinë tonë kombëtare që Shtetet e Bashkuara të ndërmarrin veprim të menjëhershëm për ta lehtësuar prodhimin minerar vendës në nivelin maksimal të mundshëm” – thuhet më tej në urdhër.
Urdhri gjithashtu bën thirrje për përshpejtimin e lejeve për mihje dhe për procesim të projekteve si dhe e udhëzon Departamentin e Punëve të Brendshme të ShBA-së që ta bëjë prioritet prodhimin minerar në toka federale.
Edhe pse ka rezerva të disa mineraleve kritike, ShBA-ja varet shumë nga shtete të tjera për furnizimin me to. Taksat e Trumpit ndaj një game të gjerë importesh kanë nxitur tensione tregtare me disa nga furnizuesit kryesorë si Kina e Kanadaja.
Mineralet kritike janë jetike për prodhimin në fusha kyçe të teknologjisë, nga bateritë deri të sistemet e avancuara të armëve.
Presidenti amerikan gjithashtu ka qenë i interesuar për të siguruar qasje në mineralet kritike të Ukrainës. Ai tha të enjten se një marrëveshje për këtë çështje do të nënshkruhet “shumë shpejt”./Nacionale
