Trump: Forcat amerikane dhe ato nigeriane kanë vrarë numrin dy të ISIS-it
Donald Trump ka deklaruar se forcat amerikane dhe ato nigeriane kanë vrarë liderin “numër dy” të Shtetit Islamik (ISIS).
“Sonte, me urdhrin tim, forcat e guximshme amerikane dhe Forcat e Armatosura të Nigerisë ekzekutuan pa asnjë gabim një mision shumë kompleks dhe të planifikuar me përpikëri për të eliminuar terroristin më aktiv në botë nga fusha e betejës,” tha presidenti amerikan në platformën e tij Truth Social të premten.
“Abu-Bilal al-Minuki, numri dy i ISIS-it në nivel global, mendonte se mund të fshihej në Afrikë, por ai nuk e dinte që ne kishim burime që na mbanin të informuar për gjithçka që bënte,” shtoi Trump.
Të paktën 65 ushtarë nigerianë janë vrarë në sulme xhihadiste në verilindje të vendit.
Al-Minuki ishte vendosur nën sanksione amerikane në vitin 2023 për lidhjet e tij me grupin Shteti Islamik.
“Ai nuk do të terrorizojë më popullin e Afrikës dhe as nuk do të ndihmojë në planifikimin e operacioneve kundër amerikanëve,” tha Trump. “Me eliminimin e tij, operacionet globale të ISIS-it janë dobësuar ndjeshëm.”
Trump falënderoi qeverinë e Nigerisë për “partneritetin” në këtë operacion, pa zbuluar saktësisht se ku ndodhi ai apo çfarë forme sulmi u përdor.
