Sulmet në Lindjen e Mesme: Pikat kryesore që duhet t’i dini
Lindja e Mesme është përsëri në fokus pas sulmit të Izraelit ndaj Iranit, ku u vranë tre prej njerëzve më të fuqishëm dhe u goditën vende kyçe të programit bërthamor iranian — ndërsa Irani tha se u përgjigj me “qindra” raketa balistike.
“CNN” sjell pikat kryesore nga këto zhvillime, të cilat i gjeni të përkthyera më poshtë:
• Goditjet hakmarrëse të Iranit: Irani kreu sulme ndaj “dhjetëra objektivave, qendrave ushtarake dhe bazave ajrore” që i përkasin Izraelit, sipas Gardës Revolucionare Islamike. Një zyrtar i lartë iranian tha se Izraeli “po përballet me një natë të errët përpara.”
• Kërcënimet e Izraelit: Kryeministri izraelit Benjamin Netanyahu, në një video të publikuar iu drejtua drejtpërdrejt popullit iranian duke thënë “më shumë po vjen,” dhe i ftoi qytetarët që “të ngrihen dhe të dëgjohet zëri i tyre.” Ai tha se beteja e Izraelit nuk është kundër tyre, por kundër qeverisë iraniane. Ministri izraelit i Mbrojtjes, Israel Katz, tha se Irani “ka kaluar vijat e kuqe” duke sulmuar zona civile dhe premtoi se do të paguajë “një çmim shumë të rëndë” për veprimet e tij.
• Sulmet izraelite në Iran: Impianti bërthamor në Natanz u godit nga një sulm me raketa, raportoi televizioni shtetëror iranian dhe mediat e afërta me shtetin. Edhe periferitë e qyteteve Tabriz dhe Shiraz u sulmuan në atë që mediat shtetërore e quajtën “një sulm agresiv.”
• Roli i SHBA-së: Kryeministri Netanyahu tha se Izraeli koordinoi “më parë” me Shtetet e Bashkuara sulmin ndaj Iranit, dhe administrata Trump ishte e informuar për këtë sulm. Ushtarakët amerikanë po ndihmojnë në interceptimin e raketave dhe dronëve iranianë, tha një zyrtar amerikan për CNN.
• Çfarë thotë Trump: Presidenti amerikan Donald Trump bisedoi më herët me Netanyahu, tha një zyrtar i Shtëpisë së Bardhë. Trump i tha CNN-it se SHBA-ja mbështet Izraelin dhe e quajti sulmin ndaj Iranit “një sulm shumë të suksesshëm.” Ai sugjeroi për Axios se sulmet izraelite ndaj Iranit mund të ndihmojnë përpjekjet e tij për të arritur një marrëveshje bërthamore me Iranin.
• Bisedimet bërthamore: Trump vendosi një afat 60-ditor për negociatat e marrëveshjes me Iranin në një letër drejtuar Ulemës së Lartë, Ajatollah Ali Khamenei, më herët këtë vit. Afati filloi kur nisi raundi i parë i bisedimeve më 12 prill dhe kaloi më 11 qershor. Izraeli është i përkushtuar të sigurojë që Irani të mos ketë më program bërthamor, tha ambasadori izraelit në SHBA, Yechiel Leiter, për CNN. Trump i tha Reuters se bisedimet amerikane me Iranin priten të vazhdojnë të dielën, edhe pse nuk është i sigurt nëse do të ndodhin.
