Shembet një medrese në Indonezi, tre të vdekur e dhjetëra të zhdukur

Punëtorët indonezianë të shpëtimit të martën po mundoheshin të lokalizonin 38 persona për të cilët ka frikë se kanë mbetur të ngujuar nën rrënojat e një medreseje islame që u shemb në provincën e Javës Lindore, përderisa dhjetëra njerëz po i kryenin lutjet e pasdites, thanë autoritetet për menaxhimin e katastrofave.

Televizioni BBC raporton se deri më tani janë konfirmuar tre nxënës të vdekur, ndërsa agjencia e lajmeve “Reuters” tha se 102 persona u evakuuan nga medreseja “Al Khoziny” në qytezën Sidoarjo, kur një ndërtesë jostabile u shemb gjatë ndërtimit. Kështu tha në një deklaratë agjencia për menaxhimin e katastrofave.

“Kjo ndodhi e papritur bëri që materiali i ndërtesës të binte mbi dhjetëra nxënës dhe punëtorë” – tha zëdhënësi i kësaj agjencie, Abdul Muhari.

Një buldozer ishte në mesin e pajisjeve të rëndë që po përdorej nga punëtorët e kërkim-shpëtimit për t’i zhvendosur rrënojat, shtoi ai, ndërsa gati 80 persona të lënduar u dërguan në spital.

Në pamje të publikuara në televizionin “KompasTV” shihen familjet e studentëve të mbledhura rreth një tabele ku ishin publikuar emrat e të mbijetuarve.

Agjencia për menaxhimin e katastrofave tha se dyshohet që themeli i ndërtesës nuk mundi ta përballonte peshën e ndërtimit në katin e saj të katërt.