ShBA-ja pritet ta ekzekutojë atë që ka pranuar se ia përdhunoi e vrau të dashurën dilerit
Një burrë nga Teksasi i Shteteve të Bashkuara, i cili ka pranuar se e kishte rrëmbyer, e kishte sulmuar seksualisht dhe e kishte qëlluar për vdekje të dashurën 18-vjeçare të dilerit të tij të drogës, pritet të ekzekutohet të mërkurën.
Mbetjet e Bridget Townsend-it nuk ishin gjetur deri në tetor të vitit 2002, dy vjet pasi ishte zhdukur, kur Ramiro Gonzalez-i, që ishte dënuar me dy dënime me burgim të përjetshëm për rrëmbimin dhe përdhunimin e një gruaje tjetër, i çoi autoritetet te vendi në jugperëndim të Teksasit, ku e kishte lënë trupin e saj, raporton gazeta “The Guardian”.
Gonzalez-i, 41 vjeç, ishte dënuar për të shtënat vdekjeprurëse ndaj adoleshentes, pasi kishte vjedhur drogë dhe të holla dhe e kishte rrëmbyer atë në janar të vitit 2001 nga një shtëpi në distriktin Bandera, në veriperëndim të San Antonios. Ai e kishte dërguar Townsend-in në rançin e familjes së tij në distriktin fqinj, Medina, ku e kishte sulmuar seksualisht dhe e kishte vrarë.
Avokatët e Gonzalezit kanë kërkuar nga Gjykata Supreme e ShBA-së që ta pezullojë ekzekutimin e të dënuarit, duke argumentuar se ai e ka marrë përgjegjësinë për atë që e ka bërë dhe që një dëshmitar ekspert i prokurorisë tani thotë se kishte gabuar gjatë dëshmisë se Gonzalezi do të ishte rrezik në të ardhmen për shoqërinë, rezultat ligjor që nevojitet për ta shpallur dënimin me vdekje.
Avokatët e Gonzalezit argumentojnë se gjykata e Teksasit për shkelje penale ia ka shkelur atij të drejtat kushtetuese përmes refuzimit për t’i shqyrtuar pretendimet se një ekspert i prokurorisë, psikiatri Edward Gripon, ka pohuar në mënyrë të gabuar se Gonzalezi do të ishte rrezik në të ardhmen. Pas rivlerësimit të Gonzalezit më 2022, Griponi tha se parashikimi i tij ishte i gabuar.
Prokurorët e përshkruan Gonzalezin si grabitqar seksual që i kishte thënë policisë se i kishte shpërfillur lutjet e 18-vjeçares për t’ia kursyer jetën. Ata argumentuan se trupi gjykues ka marrë vendim të duhur për dënimin me vdekje, sepse ai kishte histori të gjatë kriminale dhe nuk shfaqte keqardhje.
