ShBA-ja i dënon sanksionet e Britanisë e vendeve të tjera ndaj dy ministrave izraelitë
Sekretari i Shtetit i ShBA-së, Marco Rubio, të martën e dënoi vendimin e disa qeverive perëndimore për t’i sanksionuar dy ministrat izraelitë të së djathtës ekstreme, Itamar Ben Gvir dhe Bezalel Smotrich.
Në deklaratën e kryediplomatit amerikan kryesisht u përsëritën gjërat që u thanë më herët nga zëdhënësja e Departamentit të Shtetit, Tammy Bruce, por në të u përfshi edhe një thirrje nga Rubio që Britania e Madhe, Kanadaja, Norvegjia, Australia dhe Zelanda e Re ta kthejnë prapa vendimin e tyre, raporton gazeta “The Times of Israel”.
“Shtetet e Bashkuara i dënojnë sanksionet e vendosura nga qeveritë e Mbretërisë së Bashkuar, Kanadasë, Norvegjisë, Zelandës së Re dhe Australisë ndaj dy anëtarëve aktualë të kabinetit izraelit. Këto sanksione nuk i avancojnë përpjekjet e udhëhequra nga ShBA-ja për të arritur një armëpushim, për t’i sjellë të gjitha pengjet në shtëpi dhe për t’i dhënë fund luftës” – thuhet në deklaratën e Rubios, të publikuar në rrjetin X.
The United States condemns the sanctions imposed by the governments of United Kingdom, Canada, Norway, New Zealand, and Australia on two sitting members of the Israeli cabinet. These sanctions do not advance U.S.-led efforts to achieve a ceasefire, bring all hostages home, and…
— Secretary Marco Rubio (@SecRubio) June 10, 2025
“Ne kundërshtojmë çfarëdo nocioni të barasvlerës: Hamasi është një organizatë terroriste që kreu mizori të papërshkrueshme, vazhdon të mbajë peng civilë të pafajshëm dhe ua parandalon njerëzve të Gazës jetesën në paqe. Ne u sjellim ndër mend partnerëve tanë që të mos harrojnë se kush është armiku i vërtetë” – shtoi sekretari amerikan.
“Shtetet e Bashkuara bëjnë thirrje për anulimin e sanksioneve dhe qëndrojnë krah për krah me Izraelin” – thuhet në fund të deklaratës së diplomatit të lartë amerikan.
