Rusia kryen sulme të reja në disa pjesë të Ukrainës
Forcat ruse kryen sulme në pjesë të ndryshme të Ukrainës gjatë natës, përfshirë kryeqytetin Kiev dhe qytetin perëndimor, Lviv, afër kufirit me Poloninë.
Administrata ushtarake e Kievit tha se Moska kreu një sulm me dron në orët e hershme të së martës, duke i paralajmëruar banorët që të gjenin strehim. Nuk pati raportime të menjëhershme për pasoja në njerëz, raporton gazeta “The Guardian”.
Autoritetet më vonë thanë se sistemet e mbrojtjes ajrore në qytet kishin vërejtur dhe shkatërruar mbi 20 drona “Shahed” të prodhimit iranian në një “sulm masiv ajror”. Sipas zyrtarëve lokalë, ky qe sulmi i dytë me dronë në qytet nga fillimi i këtij muaji.
Një Lviv, një pjesë e infrastrukturës kritike u godit dhe u kaplua nga zjarri, tha administrata ushtarake lokale, por nuk pati persona të lënduar. Më herët, kryetari i qytetit, Andriy Sadovy, raportoi për shpërthime në Lviv dhe në zonën përreth tij. Nuk qe e qartë nëse shpërthimet erdhën nga sistemet e mbrojtjes ajrore ose nga sulmet me raketa.
Sirenat e alarmit për sulme ajrore u dëgjuan edhe në Zaporizhia, raportoi mediumi “Kyiv Independent”, duke theksuar se qyteti jugor ka qenë shumë i shënjestruar nga artileria ruse gjatë ditëve të fundit.
Situata në qytet ishte “e qëndrueshme” pavarësisht nga një “natë e zhurmshme dhe e shqetësuar”, tha kreu i këshillit të qytetit, Anatoly Kurtev.
Nuk pati raportime për të lënduar dhe as dëme ndaj ndërtesave të banimit, përderisa të gjitha sistemet e shërbimeve ishin duke punuar normalisht, tha ai.
