“Rostec”: Rusia do t’i dislokojë në Ukrainë obusët më të rinj, “Koalitsiya-SV”

Rusia së shpejti do t’i dislokojë obusët më të rinj të saj kundër forcave ukrainase si pjesë e atij që Moska e quan “operacion special ushtarak”, tha të mërkurën drejtori i kompanisë shtetërore ruse të mbrojtjes, “Rostec”.

Testimi i njësive të reja të obusëve “Koalitsiya-SV” është përfunduar dhe prodhimi masiv i tyre tashmë ka nisur, i tha agjencisë RIA Sergei Chemezov, drejtor i “Rostec”-ut, përcjell agjencia “Reuters”.

Sipas tij, grupi i parë i obusëve si pjesë e planit pilot do të shpërndahen në fund të këtij viti.

Agjencia shtetërore ruse e lajmeve, TASS, raportoi më herët këtë muaj se obusë të tillë tashmë ishin dislokuar në vijën e frontit në Ukrainë.

Këta obusë kanë rreze veprimi deri në 70 kilometra dhe janë të pajisur me topin modern 152-milimetërsh, 2A88, me kapacitet të qitjes prej më shumë se dhjetë predhash në minutë, si dhe me sistem modern të automatizimit të drejtimit të tytës, përzgjedhjes së cakut dhe navigimit, sipas agjencisë TASS.