Raportohet për “progres domethënës” në bisedimet ShBA – Iran, vazhdojnë javën e ardhshme
Bisedimet mes Shteteve të Bashkuara dhe Iranit shënuan “progres domethënës” të enjten në Gjenevë dhe diskutimet teknike për programin bërthamor të Iranit janë caktuar për t’u mbajtur javën e ardhshme në Vjenë, tha ministri i Jashtëm i Omanit, Badr Albusaidi.
Kryediplomati që është duke i ndërmjetësuar bisedimet tha në një shkrim në rrjetin X se ato “do të vazhdojnë së shpejti pas konsultimeve në kryeqytetet përkatëse”, raporton televizioni CNN.
“Diskutimet në nivel teknik do të ndodhin javën e ardhshme në Vjenë” – shtoi Abusaidi.
Më tej, ai tha se është “mirënjohës ndaj të gjithë të përfshirëve për përpjekjet e tyre: negociatorët, Agjencia Ndërkombëtare e Energjisë Bërthamore dhe nikoqirët tanë, Qeveria e Zvicrës”.
Ndërkohë, sipas mediave shtetërore ruse, përfaqësues amerikanë në Gjenevë kanë zhvilluar diskutime edhe me kryenegociatorin rus, Kirill Dmitriev.
Agjencitë e lajmeve RIA dhe TASS nuk treguan se me kë u takua Dmitrievi, por në qytetin zviceran ndodhen emisari i posaçëm amerikan, Steve Witkoff, dhe dhëndri i presidentit Donald Trump, Jared Kushner, të cilët pritet të mbajnë bisedime dypalëshe me një delegacion ukrainas për “pakon e mirëqenies”, e cila lidhet me rindërtimin e Ukrainës.
Dmitrievi u largua nga hoteli ku “pati bisedime me palën amerikane” të enjten në mbrëmje, raportoi agjencia ruse e lajmeve, “RIA Novosti”.
Të mërkurën, presidenti ukrainas, Volodymyr Zelensky, tha se rundi i ardhshëm i bisedimeve trepalëshe nuk pritet të mbahet para fillimit të marsit./Nacionale
