Presidenti i Madagaskarit e bën kryeministër gjeneralin Zafisambo
Presidenti i Madagaskarit, Andry Rajoelina, të hënën e emëroi kryeministër të vendit ishullor afrikan gjeneralin Ruphin Fortunat Zafisambo. Emërimi i tij u bë një javë pas shpërbërjes së Qeverisë si reagim ndaj protestave të vazhdueshme për shkak të mungesës së rrymës dhe ujit.
Zafisambo e zëvendësoi ish-kryeministrin Christina Ntsay, i cili ishte shkarkuar si pjesë e lëvizjeve të presidentit. Gjenerali ishte drejtor i kabinetit ushtarak në zyrën e kryeministrit deri në emërimin e tij në pozitën e lartë të ekzekutivit, raporton agjencia e lajmeve “Reuters”.
Para emërimit të kryeministrit të ri, presidenti Rajoelina tha se vendit i nevojitej një “kryeministër që është i aftë për t’i rikthyer rendin dhe besimin e popullit”.
Ai shtoi se prioritet kryesor i kryeministrit të ri do të jetë rikthimi i furnizimit me rrymë dhe ujë.
Më herët të hënën, protestuesit u rikthyen në rrugë për javën e tretë të protestave antiqeveritare.
Rajoelina e shkarkoi kabinetin e tij javën e kaluar, por shumë protestues tani po kërkojnë që politikani 51-vjeçar edhe vetë të japë dorëheqje.
Policia në kryeqytetin Antananarivo përdori gaz lotsjellës për t’i shpërndarë protestuesit, tha një reporter i agjencisë “Reuters”. Shumë prej protestuesve ishin student që po shprehnin pakënaqësi ndaj Qeverisë në protestat që filluan muajin e kaluar.
