Përsëri luftime mes Tajlandës e Kamboxhias: Vritet një banor, evakuohet një fshat

Kamboxhia të enjten evakuoi qindra njerëz nga një fshat përgjatë kufirit të kontestuar me Tajlandën, një ditë pasi një banor i fshatit u raportua i vrarë pas shpërthimit të të shtënave mes forcave të të dyja vendeve.

Të shtënat e së mërkurës ndodhën dy ditë pasi një ushtar tajlandez e humbi këmbën nga një minë tokësore, përderisa ishte duke patrulluar në një zonë tjetër të kufirit. Tajlanda e fajësoi Kamboxhian për shpërthimin dhe njoftoi se do ta pezullonte zbatimin e kushteve të armëpushimit të ndërmjetësuar pjesërisht nga presidenti amerikan, Donald Trump, raporton agjencia e lajmeve “Associated Press”.

Mosmarrëveshjet kufitare mes dy fqinjëve të Azisë Juglindore çuan në një konflikt të armatosur 5-ditor në fund të korrikut, kur u vranë dhjetëra ushtarë e civilë. Megjithatë, tensionet mbetën të larta edhe më pas. Shumë prej kushteve të një marrëveshjeje më të hollësishme të armëpushimit, e cila u nënshkrua muajin e kaluar, nuk janë zbatuar ende.

Një burrë nga Kamboxhia, i identifikuar si Dy Nai, u raportua i vrarë nga të shtënat e së mërkurës, ndërsa tre persona të tjerë u plagosën.

Rreth 250 familje nga fshati Prey Chan i Kamboxhias, ku ndodhën të shtënat, u evakuuan në një tempull budist rreth 30 kilometra larg kufirit, tha një zyrtar rajonal.

I njëjti fshat ishte vend i një ballafaqimi të dhunshëm por jo vdekjeprurës në shtator mes personelit tajlandez të sigurisë dhe fshatarëve kamboxhianë./Nacionale