Në Kolorado konfirmohen katër të infektuar me gripin e shpendëve, i pesti i dyshimtë
Shteti amerikan i Kolorados konfirmoi katër raste të të infektuarve me gripin e shpendëve, H5N1, te punëtorët e fermave të shpendëve dhe është duke e kontrolluar statusin e një personi të pestë të dyshimtë, thanë të dielën autoritetet shëndetësore.
Infektimi i njerëzve me gripin e shpendëve H5N1 mund të shkaktojë sëmundje të rëndë dhe madje edhe pandemi, nëse virusi ndryshon dhe e fiton aftësinë për t’u përhapur lehtë mes njerëzve, kanë thënë Qendrat për Kontrollimin dhe Parandalimin e Sëmundjeve (CDC) në ShBA, raporton agjencia “Reuters”.
Ky institucion i ka konfirmuar katër rastet e infektimit në Kolorado, ka thënë Departamenti shtetëror i Shëndetit Publik, ndërsa rasti i pestë është në pritje për t’u konfirmuar nga agjencia, e cila po e mbështet hulumtimin e çështjes.
“Mostrat nga një punëtor i pestë u supozuan pozitive në laboratorin shtetëror të shtunën dhe do të dërgohen në CDC për konfirmim” – thuhet në një deklaratë.
Punëtorët shfaqën simptoma të lehta, përfshirë sytë me ngjyrë rozë, dhe shenja respiratore, thanë autoritetet, edhe pse asnjëri prej tyre nuk ishin në spital.
