Irani e Izraeli vazhdojnë të shkëmbejnë sulme: Informacionet e fundit që duhet t’i dini

Izraeli dhe Irani kanë shkëmbyer sulme të reja edhe mesnatën e së premtes, ndërsa konflikti mes tyre po hyn në javën e dytë pa ndonjë përparim në përpjekjet diplomatike.

Siç raporton CNN, një zyrtar iranian ka thënë se presidenti amerikan Donald Trump mund ta përfundojë konfliktin me një telefonatë ndaj Izraelit – duke shtuar se Irani do të rikthehet në bisedimet me SHBA-në vetëm nëse ndalen sulmet ndaj tyre.

Kjo ndodh pas përpjekjeve të dështuara për të ulur tensionet në Gjenevë, ku diplomatët kryesorë evropianë u takuan me homologun e tyre iranian të premten.

Ja zhvillimet më të fundit:

• Sulmet më të fundit nga Izraeli: Një zyrtar iranian tha se kompleksi bërthamor në Isfahan – objekti më i madh kërkimor bërthamor në Iran – u godit nga një sulm ajror izraelit të shtunën. Zyrtari tha se nuk kishte rrjedhje materialesh të rrezikshme pas sulmit, por banorëve iu kërkua të qëndronin larg zonës për të lejuar ekipet e shpëtimit të punojnë.
• Sulme në Qom: Dy persona u vranë dhe katër të tjerë u plagosën nga një sulm direkt ndaj një ndërtese banimi në qytetin e shenjtë të Qomit, në Iranin qendror, sipas mediave shtetërore. Lajmi erdhi menjëherë pas njoftimit të Forcave të Mbrojtjes së Izraelit se kishin nisur një valë të re sulmesh në Iran.
• Sulmet e fundit nga Irani: Shërbimet emergjente në Izrael u thirrën në një ndërtesë që kishte marrë flakë në qytetin Holon, pasi Irani lëshoi një valë raketash gjatë natës. Zjarri u shkaktua nga copëza të raketës pas ndërprerjes së saj në ajër. Sipas shërbimit të zjarrfikësve izraelitë, nuk pati të lënduar.
• Thirrje për diplomaci: Një zyrtar iranian i tha CNN-it se SHBA mund ta “ndalojë luftën” me një telefonatë, nëse Trump i kërkon Izraelit të ndalojë sulmet. Por Trump tha para gazetarëve në Nju Xhersi: “Është shumë e vështirë ta bësh këtë kërkesë tani nëse dikush është duke fituar.”
• Bisedimet në Gjenevë: Nuk pati ndonjë përparim pas takimit të një zyrtari të lartë të BE-së dhe ministrave të jashtëm të Britanisë, Francës dhe Gjermanisë me homologun iranian të premten. Ministri i Jashtëm iranian tha se nuk do të rikthehen në negociata me SHBA-në sa kohë që Izraeli vazhdon sulmet.
• Çështje të inteligjencës: Presidenti Donald Trump kritikoi drejtpërdrejt drejtoreshën e inteligjencës kombëtare, duke thënë se Tulsi Gabbard “e ka gabim” për përpjekjet e Iranit për të marrë armë bërthamore. Gabbard kishte dëshmuar në Kongres në mars se Irani nuk po ndjek në mënyrë aktive ndërtimin e një arme bërthamore – gjë që bie ndesh me pretendimet e Izraelit se Irani është pranë ndërtimit të saj. Kur u pyet për vlerësimet e shërbimeve të tij të inteligjencës, Trump tha: “Atëherë, shërbimet e mia të inteligjencës e kanë gabim.”
• Në Turqi: Organizata për Bashkëpunim Islamik, që përfaqëson zërin kolektiv të botës myslimane me 57 shtete anëtare, do të mblidhet në Stamboll të shtunën. Në takim do të marrë pjesë edhe ministri i jashtëm i Iranit, i cili tha se do të diskutojnë për “agresionin e kryer nga” Izraeli.