Irani do të kundërpërgjigjet “në kohën e duhur” për vrasjen e Haniyeh-ut

Ministri në detyrë i Punëve të Jashtme i Iranit, Baqeri Ali Bagheri Kani, ka thënë se vendi i tij do të kundërpërgjigjet për vrasjen e kreut të Hamasit, Ismail Haniyeh, në “kohën e duhur” dhe në mënyrën “e duhur”, pas një dite me diplomaci intensive në Lindje të Mesme.

Komentet e tij erdhën gjatë një takimi urgjent të Organizatës për Bashkëpunim Islamik, grup shtetesh me shumicë myslimane, të cilat u mblodhën në Arabi Saudite për të diskutuar rreth kundërpërgjigjes së Iranit për vrasjen e figurës së lartë të Hamasit.

Shtetet e Bashkuara thanë se shpresonin që vendet anëtare të Organizatës për Bashkëpunim Islamik do ta paralajmëronin Iranin kundër “hapave për eskalimin e konfliktit”.

Tensionet në Lindje të Mesme janë rritur që nga vrasja e Haniyeh-ut në Teheran javën e kaluar. Irani dhe aleatët e tij e kanë fajësuar Izraelin, edhe pse ky shtet nuk ka dhënë ndonjë koment, raporton televizioni BBC.

Organizata për Bashkëpunim Islamik u mblodh të mërkurën në qytetin Jeddah të Arabisë Saudite, me kërkesë të zyrtarëve iranianë e palestinezë.

Kryediplomati iranian në detyrë iu tha anëtarëve të kësaj organizate se “është e pritshme” që ata ta përkrahin kundërpërgjigjen e Iranit për vrasjen e drejtorit të byrosë politike të Hamasit.

Në një deklaratë të lëshuar më vonë nga Organizata për Bashkëpunim Islamik thuhet se blloku e mban Izraelin “plotësisht përgjegjës” për “sulmin e neveritshëm”, të cilin e përshkroi si “shkelje serioze” të sovranitetit të Iranit.

Megjithatë, organizata nuk shprehu mbështetje për ndonjë veprim ushtarak të Iranit.

Në prill të këtij viti, Irani hodhi më shumë se 300 raketa e dronë drejt Izraelit, por gati të gjitha u rrëzuan. Ky veprim ishte hakmarrje për një sulm ndaj një kompleksi diplomatik iranian në Siri./Nacionale